Mga Tula

MGA TULA NI KIMBERLY GO

Balangaw 

ni Kimberly Go

Ang kalikasan nating kay ganda ganda.

Ito ay hiwaga na para bang apoy.

Siya ay walang kupas kung magpahanga

Ang misteryo nitong hindi mo matukoy.

Ang ating kalangitan na kulay bughaw

Ngunit bakit tila ito’y lumuluha.

Ang aking nakita ay isang balangaw

Simbolo ng pagbangon at pag-asa

Anong nangyari sa Inang kalikasan?

Pagbigay ng ating pangangailangan

Kapalit natin ay ating kapabayaan

At walang awa nating kinalimutan

Mga tao rin siyang may kasalanan

Wala nga rin itong pahahantungan

Kung hindi rin tayo ang magtutulungan

Kung ito’y masira tayo’y mawawalan.

Tatsulok

ni Kimberly Go

Ang buhay ng tao ay parang tatsulok

Taong naka-Amerikano at barong

Mga anak-pawis na sila’y nagluklok

Umasang sila’y aangat at yayabong

Mga taong nananatili sa ibaba

At ang mga inosenteng nakahandusay

Tahimik na pamumuhay at payapa

Minimithi nilang kagandahan ng buhay

Mga taong tinitingala sa itaas

Sila ay patuloy na nang-aabuso

Sa larangan ng buhay sila ay batas

Taong mapagpanggap ngunit sila’y tuso

Pati walang sala napagbibintangan

O mundo na parang walang karapatan

Mga mamamaya’y nagkakaubusan

Sa aking mahal na bansang sinilangan

Ang tala

ni Kimberly Go

Ang mga tala na aking tinitingala

Sa kalangitan na aking pinagmamasdan

Pagdadasal ko sa munting kapilya

Na balang araw ito’y masusuklian

Subalit kailangan ko rin ang magsagwan

Kahit na mahirap hindi bibitaw

Alam ko na ito’y may patutunguhan

Sa dilim ng kalawakan ikaw ang ilaw

Pagguhit at pagbasa ng mga aklat

Paghihirap para lamang ika’y makamtan

Nagkasugat man ako at nagkapeklat

Alaala na di ko malilimutan

Balang araw na ikaw ay makakamit

Paghihirap ko na masusuklian

Mga natutunan ko na magagamit

Na laging lumingon sa pinanggalingan

Bughaw at pula

ni Kimberly Go

Sa aking lupang sinilangan

Bayan na aking kinalakhan

Kung saan ang bughaw ay nasa kalangitan

At ang pula ay nasa kailaliman.

Ngunit ano na nga ba ang nangyari?

Dumadanak na kulay pula sa aking tinatapakan

Mga taong pinatay na walang kalaban laban

Nasaan ang hustisya?

Ang taong naka-piring na may bitbit na timbangan

Sino nga ba ang lamang?

Lagyan mo ang isa ng bugkos ng pera

Siya na ang lalamang

Nasaan na aking kinagisnan?

Tahimik at payapa na aking minimithi

Ay di mo na makakamtan

Ito ba ang gusto niyong kalabasan?

Karera

ni Kimberly Go

Sa senyales na aking napakinggan

Ito ay hudyat na ng aking laban

Pagtakbo sa abot ng aking makakaya

Sa pagnanais ko na ako rin ay magiging malaya

Balakid na sa daan ko’y humaharang

Mga problema na aking dinadaing

Hirap na aking kinalimutan

Ako nga pala’y may pinaglalaban

Sa bawat hakbang na aking ginagawa

Dalawang tao ang nasa isipan

Mga alala na di ko makakalimutan

Kung paano niyo ako inalagaan

Tanaw ko na ang dulo

Ngunit isang tanong ang nasa isipan

Ito nga ba ay paunahan?

Bakit tila wala ang kaligayahan?